Hef ekki bloggað lengi

en er að hugsa um að bæta aðeins úr því núna - sjónvarpið svo assgoti leiðinlegt að það hálfa væri nóg.   Er búin að kíkja bloggrúnt - hanga á fésbókinni - fara í langt og gott bað og fannst þá upplagt að leggjast fyrir framan sjónvarpið og hjálpa bóndanum  að horfa á sjónvarpið.  Gekk ekki upp vegna leiðinda

Bóndinn er þaulsætinn fyrir framan sjónvarpið þessa dagana enda ekki völ á öðru.  Hann lagðist undir hnífinn 26 jan og kom heim sólarhring seinna með utanáliggjandi varahlut.   Og í þessari stellingu er bóndinn nánast búinn að vera síðan hann kom heim.

Þetta er mjög sársaukafullt eins og er en samkv lækninum þá ætti sársaukinn að fara að minnka á næstu 2-3 vikum og hann þá að geta snúið sér að því æfingum og jafnvel farið að staulast um, þ.e. a.s lengra en á salernið og inn í rúm. 

Eins og er heldur hann til í stofusófanum á daginn, með kaffivélina við höndina, símana, tölvuna og slatta af pepsimax.  Ég set matarkyns á stofuborðið áður en ég fer í vinnuna og svo eitthvað meira í ísskápinn sem hann annaðhvort sækir sjálfur um hádegið eða bíður eftir að bræður komi heim úr skólanum svo þeir geti stjanað við hann.

Hann er furðu skapgóður ennþá miðað við hvað hann á erfitt með að þola aðgerðarleysi.  Það má kannski þakka öllum fínu töflunum hans  - ekki er hann svona glaður yfir því að hanga heima allan daginn og horfa á sápuóperur.

Bræður fengu ágætis umsagnir í foreldraviðtölum í síðustu viku - annar er reyndar dáltítið ör og á erfitt með að vera kyrr í tímum en hinn er alla jafna stilltur og prúður.  Sá stillti er reyndar ekkert alltaf stilltur en hann var sendur á skrifstofu deildarstjóra í þarsíðustu viku.  Tölum ekki meira um það.  En þeir virðast hafa þokkalega góða (meðal) greind og eru báðir vel yfir viðmiðunarmörkum í lestri.  það má nú monta sig af því.

Foreldrar ákváðu um daginn að tími vasapenings fyrir bræður væri runninn upp.  Það var almenn hamingja með það og ekki laust við að bræður finndu til sín þegar þeir skrifuðu undir sinn hvorn samninginn.  Þeir þurfa að uppfylla ákveðin skilyrði til að fá fullan vasapening.  Ef einhverjar skyldur eru ekki uppfylltar þá dregst ákveðin upphæð af.  Eins gott að gleyma engu.    í samningnum er ákvæði um sparnað.  Ef strákur vill spara vasapening - hluta eða allan - þá fær hann vexti.  Ef hann ákveður að spara litla upphæð þá fær hann litla vexti - ef hann vill spara stóra upphæð þá fær hann mikla vexti.   Þetta eru gríðarlega góð vaxtakjör - allt upp í 60 % .  En gilda bara fyrir erfingjana svo það þýðir ekkert fyrir aðra að sækja um.

Annar strákur sparar um 80 % af sínum pening og fær ca 20% út.  Hinn strákur sparar um 20-30 % og fær hitt út.     Meðan annar er aurapúki og nurlari sem þykir gott að vita að hann á pening þá er hinn gjörsamlega viðþolslaus ef hann á pening og vill eyða honum ekki seinna en strax. 

Það er komin dagsetning á Hammond hátíðina - bara hamingja með það :-)