Tvö í kotinu

Við erum bara tvö í kotinu við hjónin og búin að vera í næstum tvo sólarhringa.  Föstudagurinn rann loksins upp en þá áttu bræður pantað flug til afa og ömmu fyrir austan.  Það er spennandi, bæði að fara aleinir í flugvél og ekki síður að fara einir í heimsókn, engir foreldrar með. 

Föstudagurinn rann loksins upp - pabbi vaknar eldsnemma til að vera mættur á réttum tíma í vinnu í Reykjavík og mamma þurfti líka að mæta eldsnemma í Reykjavík í læknastúss.  Því var ákveðið að bræður kæmu, að sjálfsögðu einir, með rútu í Reykjavík.  Það var líka töluvert spennandi.

Um hádegið var læknastússi mömmunar lokið og hún tók á móti bræðrum sem þóttust nú aldeilis veraldarvanir, búnir að fara "aleinir" í rútu og sátu meira að segja aftast

Að venju voru bræður svangir.  Því var snarlega bjargað með aðalrétti á KFC og svo eftirrétti á Metro.   -  Við fórum í búðir, skoðuðum tölvuleiki og fleira skemmtilegt - fórum svo í Kringluna þar sem bræðrum tókst að eyða peningunum sínum.

Við ákváðum að fara í fyrra fallinu á flugvöllinn - tékka okkur inn snemma og vera tilbúin.  Það gekk allt eftir NEMA hvað seinkun varð á flugi og í staðinn fyrir að fara í loftið kl 18,00 var klukkan orðin 19,20 þegar bræður voru komnir út í vél. - það var MJÖG erfitt að bíða og lá við að annar sonurinn fengi taugaáfall yfir þessu öllu saman því honum var ýmislegt annað gefið í vöggugjöf en þolinmæði.

Annar sonurinn hringdi í mig í dag - vildi vita hvað ég væri að gera.  Ég sagði honum það.  Hann hafði það afar gott, var nýbúinn að vera í klukkutíma í tölvunni hennar ömmu.  Svo tilkynnti hann mér í óspurðum fréttum að hann hefði ekki farið að sofa í nótt fyrr en klukkan hálf eitt.  Af hverju fór hann svona seint að sofa ?  Já  hann var nefnilega að horfa á bannaða mynd.   Lúxuslíf að vera hjá afa og ömmu.   Ætli hann eða þeir bræður vilji nokkuð flytja heim aftur !

Frá og með morgundeginum verður bóndinn bara einn í kotinu - bræður verða áfram fyrir austan en húsmóðirin þarf að leggjast inn á spítala.  Í byrjun júnímánaðar kom í ljós að frúin er með æxli í höfðinu og það á að fjarlægja í fyrramálið.  Þetta æxli er að öllum líkindum búið að vera þarna í mörg ár og 99,9% líkur á því að það sé góðkynja.  Það er frekar ofarlega í höfðinu og ekki í heilanum heldur við höfuðkúpuna.  Að sögn læknis er það á  "auðveldum" stað fyrir aðgerð. 

Aðgerðin verður í fyrramálið og að henni lokinni verð ég á gjörgæslu í sólarhring.  Ef allt gengur vel kemst ég svo heim á föstudag.   Ég er þokkalega róleg yfir þessu öllu saman og trúi því, þar til annað kemur í ljós, að þetta fari allt vel. 

Stefnan er svo tekin á ljótupeysupartí seinna í mánuðinum, mæta ekki allir þangað ?

   

 

 

Athugasemdir

[Hafdís. (IP-tala skráð) 4.7.2011 kl. 13:23]

Gangi þér sem allra best Birgitta mín og sjáumst hressar í ljótupeysu partíinu.Eiga allir ljótar peysur eða þurfa kanski að kaupa þær.?

[Norska mágkona (IP-tala skráð) 4.7.2011 kl. 15:31]

Gangi þér vel litla kellingin.... Hlakka til að sjá þig um helgina og kyssa á bágtið. Komdu þér svo á fætur og þið hjónin megið svo alveg hætta að vera svona mikið hjá læknunum! Komið nóg í bili.

xx og x frá Norge