óhæft foreldri

Ef ég væri eins og Britney Spears, alltaf með papparassastóðið á hælunum þá væri þetta ansi algeng fyristögn.  Það hefur ekki verið farið mikið í búð síðastliðna viku, aðallega vegna ófærðar. 

Á fimmtudagskvöld sofnaði ég yfir sjónvarpinu, vaknaði um hálf ellefu og mundi eftir að það átti eftir að gera 6 nestispakka fyrir morgundaginn  ( morgunhressingu, hádegismat og síðdegishressingu ) x 2.  Hefði svo sem ekki verið mikið mál nema hvað það voru ekki til nema 5 brauðsneiðar.  Tvær þeirra voru myglaðar og af hinum þremur þurfti að skera skorpuna af ( byrjuð að mygla )   Annar drengurinn borðar nánast enga ávexti og grænmeti var af skornum skammti.  Þetta leit ekki allt of vel út.  En hálfur pakki af flatbrauði sem fannst fyrir tilviljun og soðið pasta bjargaði því að drengirnir þurftu ekki að svelta.

Eftir skóla á föstudegi ( enginn varð veikur af "myglaða" brauðinu ) fóru drengirnir á fyrstu sundæfingu vetrarins en mamman í klippingu og lit hjá hárgreiðslufrænku.  Þar sem ísskápurinn var tómur var ákveðið að "junk food" yrði á matseðlinum.  Allt í lagi með það nema hvað hársnyrtingin dróst á langinn og það voru sársvangir drengir ( glorsoltnir og alveg að deyja úr hungri að sögn ) sem opnuðu útidyrnar og góluðu á mömmu sína og mat klukkan hálf átta um kvöldið.   Ekki nóg með að maður fæði gjölskylduna á ruslfæði heldur gerir maður tilraun til að svelta hana í hel fyrst

Í dag ( laugardag ) var þó til serios þannig að það var morgunmatur.  hádegismaturinn var hins vegar snæddur á Fridays í Smáralindinni ( meira ruslfæði ) og þar er fjölskyldan búin að eyða ágætis tíma í dag.   mamman gerði þau "mistök" að fara inn í dömudeildina í Debenhams og þar nöldruðu drengirnir hástöfum allan tímann með þjáningarsvip á andlitinu.  " það er svo leiðinlegt í búðum, ég vil ekki vera hér lengur, ohhh enn ein búðin " .  Þetta hljómaði eins og þeim væri dröslað í búðir allar helgar.      

Ég er ósköp fegin að vera ekki eins og Britney Spears.

Annars er búið að fara í búð svo blessuð börnin þurfa ekki að fara með myglað brauð í skólann á mánudag.

kv húsmóðirin sem þyrfti á heimilishjálp að halda