Er þetta nautakjöt ?

spurði JA í gærkvöldi þegar hann leit á matarborðið.  Mamman þagði smá stund en benti svo á sundurskorinn sviðakjammann og spurði á móti , ertu að meina þetta ?   Ég veit að barnið fær ekki oft nautakjöt ( alla vega ekki heima hjá sér ) og enn sjaldnar þorramat sem var á boðstólum hér í gær.  Svið, hangiket, lifrarpylsa, rófustappa, súrmatur, harðfiskur, flatbrauð og rúgbrauð.  Sú hefð hefur skapast hér á bæ að bóndinn fær þorramat á bóndadag og bjór með.  Hann er alsæll með það og þá er takmarkinu náð.  Er ekki bóndadagurinn fyrir bóndann ?

SÁ kom með gjöf handa pabba heim úr skólanum í tilefni dagsins - fína vatnslitamynd af húsinu okkar.  Voða sætt  og pabbinn ánægður með myndina.   Bræðrum fannst greinilega mamma skilin pínulítið útundan, að pabbi , og pabbar almennt ,ættu svona"bóndadag"     Er þá bóndakonudaguinn á morgun ? spurði JA  - pabbin gat ekki stillt sig um að skella upp úr en mömmunni gekk betur að hafa stjórn á svipbrigðunum og skýrði út fyrir drengnum að eftir 30 daga ( eða um það bil ) væri dagur sem  héti konudagur.  Bræður voru sáttir við það.

Reykjanesbrautin var ófær í gær og Grindavíkurveguinn illfær svo ég komst ekki í vinnuna í gær.   Í staðinn aðstoðaði ég í mötuneyti grunnskólans í staðinn.  Alltaf gaman að prófa eitthvað nýtt. 

Nú eru farnir að koma tölvupóstar úr skólanum vegna SÁ - óhlýðni og ókurteisi    hvar endar þetta eiginlega ?  Enn og aftur velti ég því fyrir mér hvar mér hafi mistekist í uppeldinu. 

Bræður settust við lærdóm í morgun þegar barnaefnið í sjónvarpinu var lokið.  Skrifuðu stórt I og gerðu svo tvö verkefna blöð i stærðfræði.  JA las líka í lestrarbókinni en SÁ kláraði sinn lestur í gær.  Á morgun þarf bara að skrifa litla i og þá er verkefnavinna vikunnar  búin.  Bara lestur daglega.  Fínt fyrirkomulag og hentar vel svona.

Mamman fékk nett nostalgíukast þegar var byrjað að sýna  gamalt barnaefni sem heitir " Einu sinni var "  ( Allir sem eru komnir yfir 28 ára aldurinn hjóta að muna eftir því )   Bræður voru alveg með á nótum hvað mömmu þótti þetta skemmtilegt og létu hana samviskulega vita þegar þáttur nr 2 var sýndur í dag.    Myndgæðin eru ekkert séstök og upphafslagið sker í eyrun það er svo falskt en það er algjört aukaatriði. Gaman gaman.

Bræður fóru út að heimsækja vin sinn, ég ætla að vinna upp gamlar húsmóðursyndir á meðan. 

 

  

Athugasemdir

[Ingþór (IP-tala skráð) 26.1.2008 kl. 15:13]

Ég fékk nautakjöt á bóndadaginn, hefði ekkert verið á móti því að fá þorramat, en það er ekki í boði hérna. Hinsvegar fæ ég þorramat 9. feb þar sem það verður þorrablót hjá okkur.

kv, norski bróðir

[Húsmóðir, 26.1.2008 kl. 15:32]

Sko - drengurinn fékk nautakjöt um síðustu helgi, ægilega fína steik sem var meir og mjúk.  Hann ætti að muna hvernig nautakjöt lítur út.