gerist eitthvað ?

Líf mitt er frekar rólegt þessa dagana, ég vinn heima í bókhaldi á morgnanna ( svona ef ég hef verkefni ) - elda mat og þvæ þvott, passa upp á að bræður mæti á tækvandó og fótbolta æfingar á réttum og með minna sumarveðri þá fjölgar þeim skiptum sem maður þarf að skutla.

Svo má ekki gleymast að það þarf að láta þá bræður læra og það getur bara verið heilmikið mál stundum, sérstaklega þegar þeir láta ekki sjá sig fyrr en líður að kvöldmatartíma

Annars fór ég á Akranes á miðvikudagskvöldið ( þurfti nú samt ekki að keyra nema til Reykjavíkur, fékk far þaðan ) og eyddi dásamlegu kvöldi með góðum vinkonum mínum.

Á fimmtudagskvöld fór ég aftur í Reykjavík en bóndinn var að fá sveinsbréfið sitt afhent ( sko minn )  

Eftir þessar tvær Reykjavíkurferðir og minni hvíld var orkan mín gjörsamlega búin og föstudagur og laugardagur fóru í að hvíla sig.  Ég er því vel sofin eftir helgina.

Grindavíkurliðið kom öllum á óvart og hélt sér í Pepsideildinni   Eflaust mikil gleði á fótboltaballinu í gær - allavega var bærinn dauður í dag.

Tengdafjölskyldan fer minnkandi með degi hverjum

 

• Bóndinn hefur tapað 15 kílóum síðan í maí
• Tengdapabbi er ca 30 kg léttari en hann var fyrir ári síðan
• En mágur minn er eiginlega horfinn en hann er hátt í 70 kílóum léttari en hann var um áramótin.

 

 Ég er ennþá bæði feit og falleg - fríkkaði mikið í síðustu viku þegar ég fékk eftir fyrstu hársnyrtinguna eftir aðgerð.  Gráu hárin sjást ekki lengur, eru falin undir fallegum lit og strípum.  

 

Ekki minn dagur í eldhúsinu

Seinnipartinn í gær ákvað ég að baka brauð, nánar tiltekið maltbrauð sem ég hef bakað nokkrum sinnum áður.

Ég gerði eina uppskrift ( þetta er stór hleifur sem er bakaður í einu lagi ) og meðan hann var í ofninum ákvað ég að hnoða í aðra.

Eitthvað hef ég feilreiknað bökunartímann því fyrri hleifurinn var hrár í miðjunni - vantaði slatta upp á að vera bakaður. 

Seinni hleifurinn var betri en samt ekki full bakaður   - með því að skera utan af honum þá náðist nóg brauð til að hafa með kakósúpunni sem var á boðstólum þetta kvöldið.

Eftir tvær fullar skálar af súpu, með þeyttum rjóma og bruðum tilkynnti annar sonurinn að amma á Djúpavogi gerði rosalega góða kakósúpu.  " Hún er nú eiginlega best " en hefur sennilega þótt svipurinn á mér eitthvað skrýtinn því hann var fljótur að bæta við " en þín súpa er sko næstbest "

12 sept 2011 var EKKI minn dagur í eldhúsinu 

Bakstur framundan ?

Ég fjárfesti í 40 kílóa poka af frekar grófu mjöli því ég ætla að vera svo sparsöm og dugleg að baka í vetur. Og að sjálfsöðgu á allur þessi bakstur að vera í heilnæmari kantinum.

Fall er fararheill - eða verð ég ekki að vona það, svona miðað við hvernig afraksturinn eftir fyrsta bakstursdaginn var.

Umsagnirnar voru á þessa leið :

Brauðið var of þurrt, meira að segja nýbakað með smjöri
orkubitarnir : það var ekkert bragð af þeim ( mátt segja meira súkkulaði næst mamma )
Múslíbitarnir - þurrir og bragðlausir - þrátt fyrir súkkulaði og döðlur ( Það var reyndar of lítil feiti í þeim, ég veit það )
Kryddbrauðið - fékk hvorki hrós né last en ég held reyndar að eiginmaðurinn hafi verið afar svangur !

Óska eftir töfraráðum hvernig er hægt að umbreyta grófu heilhveiti í ætilegt og heilsusamlegt bakkelsi.

Full eitthvað

Full gróft ?

Full skrítið? 

Full snemmt ?

Full eitthvað

Þegar næstum 10 ára unglingar sem í gær suðuðu um nammi eða dót,   eru í dag farnir að lesa Séð og Heyrt þegar þeir bíða með mömmu sinni í röð í matvöruverslunni.  

Eftir 12 kennsludaga á þessum vetri er frí í skólanum vegna starfsdags bæjarins.  Bræður voru svo ánægðir með frídaginn að annar var vaknaður klukkan rúmlega 6 og hinn rúmlega 7.  Skilettekki.

Föstudagur og stemming í bænum vegna Útsvars 

milljónamæringur

" þegar ég verð fullorðinn og verð milljónamæringur, þá ætla ég að fara til Bandaríkjanna og búa á lúxushóteli.  Svo ætla ég að fara á alla körfuboltaleikina sem mig langar til "

Mikið vona ég að draumar sonar míns eigi eftir að rætast 

með grátt í vöngum og skegg

Jahá - nú er það opinbert, konan er komin með grá hár - bæði á hægri og vinstri hlið, staðfest af eiginmanni og báðum sonum  Fæ væntanlega faglega staðfestingu á því þegar ég heimsæki hárgreiðslufrænku næst. Það verður því ekki bara klipping næst þegar ég panta tíma ( sem er sko ekki vanþörf á ) heldur líka litun !

Um daginn dreymdi mig að ég væri komin með skegg - alskegg.  Sem betur fer var það ekki grátt. 

Bræður eru komnir í 5 bekk og þurfa nú að læra eðlisfræði sem þykir ennþá pínulítið spennandi.  Eða allavega eðlisfræðistofan.  Skólinn er þó ennþá í heilu lagi og ekki hafa borist fréttir af neinum sprengingum ennþá.  En veturinn er nú bara nýbyrjaður....................

Það gekk þó merkilega vel að byrja að vakna snemma aftur en bræður eru ennþá ekki búnir að sætta sig við að þurfa að fara fyrr að sofa.  " Ég get ekkert farið að sofa núna sagði sárhneykslaður sonur eftir skóladag nr 2, klukkan er bara aðeins meira en níu "  Fannst hann vera órétti beittur og lífið ( lesist foreldrar ) ósanngjarnt.   Hann var þó fljótur að sofna blessaður.  Einnig finnst bræðrum fúlt að geta ekki horft á almennilegt sjónvarpsefni eins og CSI og aðra spennuþætti sem eru of seint á dagskrá að mati hinna ósanngjörnu foreldra. 

 Sá stóri er hættur að vera stjórinn í vinnunni, hr yfirmaður er mættur aftur.  Fyrsta sem hann gerði var að fara í vínbúðina og kaupa bjór.  Þegar maður er stjórinn, með stjórasímann og alltaf á bakvakt þá er ekkert í boði annað en kók og vatn.   Svo þið getið ýmindað ykkur hvort bjórinn hafi ekki smakkast vel.

pallaveður um helgina - bæði laugardag og sunnudag.  Fyrir þá sem ekki vita þýðir pallaveður að það er hægt að vera fáklæddur úti á palli.

Ég ætla á Laugardagsvöll ( í fyrsta skiptið á æfinni ) á morgun - Ísland - Kýpur.  Ykkur  misheyrðist ekki - ég ætla  á fótboltaleik.  Bræður fara á völlinn í boði KSÍ og í fylgd með fullorðnum.  þar kem ég til sögunnar.  En þetta verður bara gaman.  Pabbinn fer með ef hann kemst.

Ég á stefnumót við hr skurðlækni í vikunni.  Fróðlegt að heyra hvort hann verður ánægður með batahorfur mínar eða ekki.  Ég er ekki tilbúin að fara í fulla vinnu alveg strax en tel mig alveg færa um byrja að vinna eitthvað. Það kemur allt í ljos.

Heyrði í norska bróður í kvöld - smá tölvuhjálp.  Aumingja hann að vera tölvusnillingurinn í fjölskyldunni - allir leita til hans.  En hann hjálpaði mér og á þakkir skildar fyrir það.

CSI næst á dagskránni - og bræður löngu sofnaðir  múhahahaha..... 

 

 

Sumarfrí bráðum búið

Styttist í skóla hjá bræðrum og engin sérstök tilhlökkun í gangi yfir því  Fyrir tilvonandi unglinga sem hafa fengið að vaka til 10-11 á kvöldin - vakna þegar þeim sjálfum dettur í hug og vera eins og fuglinn frjáls á daginn, finnst tilhugsunin um að vakna snemma, heimalærdóm, skólatöskur og snemma að sofa EKKERT freistandi.

Mömmur -  og ekki bara á þessu heimili - bíða hins vegar spenntar eftir því að skólin byrji og rútína komist á heimilishald.  

Heimilishjálpin (amma) að austan er nýfarin heim aftur.  Hún sá til þess að húsið liti betur út að innan og einnig eignaðist ég tvennar nýjar buxur og eina flíspeysu.  ( Lesist = hún tók til og þrengdi og breytti fötum fyrir mig svo nú passa þau )  Einnig gerði hún við föt af bræðrum sem voru rifin og með götum

Sá stóri er stjórinn í vinnunni þessa dagana - hr yfirmaður er í fríi erlendis.  Nú er hann með 3 síma með sér dags daglega.  Þ.e. prívatsímann - vinnusímann og svo stjórasímann.  Eins gott að eiga vinnubuxur með nóg af vösum.   Ljóshærði sonurinn vildi fá skýringu á aukasímanum - af hverju pabbi væri með 3 síma.  Þegar hann vissi að núna væri pabbi stjórinn þá kom " fær hann þá ekki hærri laun ?  Er hann ekki á lúsarlaunum ? "  Við hjónin fengum á tilfinninguna að þarna hefði strákur séð tækifæri :  ef pabbi fengi hærri laun þá væri líklegra að eitthvað "eigulegt" skilaði sér í vasa sonarins.  Við spurðum hann hvað lúsarlaun væru og hann vissi að það væru " ekki mikil laun eða mjög lítil laun " svo hann greinilega skildi orðið.

 En til fyrirbyggja misskilning þá eru launa- og peningarmál okkar hjóna ekki rædd fyrir framan börnin og aldrei verið nefnt að eiginmaður sé á lúsarlaunum. Þetta er því algjörlega frá syninum komið. 

Synirnir eru orðnir afar hárprúðir og ekki möguleiki að ég fari með þá svona loðna á skólasetninguna.  Ég leggst því á hnén fyrir framan hárgreiðslufrænku á mánudaginn og bið um klippingu fyrir afsprengin.  Mér veitir reyndar ekki af klippingu heldur en ætla að láta það bíða aðeins, hársvörðurinn og örið er ennþá dálítið aumt.

Sjálfri líður mér ágætlega en finnst ganga afar hægt að fá orkuna aftur. Finnst eiginlega hafa komið afturkippur.  Gæti reyndar skipt máli að ég fékk sýkingu í sárið á vinstri hönd ( þar sem blaðran/hnúturinn var tekinn) og þurfti að fá pensilín.  En pensilínkúrinn er búinn svo nú er bara að sjá hvað gerist.  Best að taka vítamín og lýsi og fara í smá göngutúr 

Talandi um sumarfrí.........

´Bræður fóru að sofa um 23,30 í gærkvöldi og sofnuðu fjótlega.

Ég vakti þá rétt fyrir hálf tíu í morgun.  Þeir lögðust fyrir framan sjónvarpið og fundu sér einhvers staðar tíma fyrir morgunverð.  Klukkan 11,45 var slökkt á sjónvarpi ( að minni skipan ).  Í staðinn fyrir að búa um rúmið, klæða sig og fara út hafa bræður tekið þann pólinn í hæðina að skríða upp í rúm aftur og liggja þar hinir letilegustu með bækur og/eða Andrésblöð.

Er þetta kallað að vera í sumarfríi.....................?

Allt í góðum gír

eða þannig - heilsufarið mjakast smá saman í rétta átt og ekkert nema gott um það að segja.  Ég tek vítamín og lýsi og  reyni að fara í styttri göngur daglega.  Þarf ekki að byrja undirbúning fyrir kvöldmat fyrr en klukkan 17-18 í staðinn fyrir 13-14 eins og var áður.    Sem sagt - allt á réttri leið.

Smá útilega um verslunarmannahelgina eða ein nótt í tjaldvagninum.  Ég var stólakartafla ( hefði verið sófakartafla ef við hættum útilegusófa) og gerði lítið annað en að sofa, lesa og borða.   Leið ljómandi vel með það og kom spræk heim.  Venjulega þegar við förum í útilegu þá eru ég og bræður mjög dugleg að kanna umhverfið og skoða okkur um en ekki í þetta sinn.  Mín útivera miðaðist við að ganga milli salernis og tjaldvagns.  Bræður og pabbi fóru að viðra veiðistangirnar - eða það hlýtur að vera, ekki komu þeir heim með afla.

2 ágúst lagðist ég, eða vinstri höndin á mér, undir hnífinn.  Kúla í innanverðum vinstri lófa ( fyrir neðan vísifingur) var fjarlægð.  Það var blaðra eða góðkynja æxli á sin.  Ekkert hættulegt og ég á ekki von á því að það verði neinn eftirmáli af þessu.

Styttist í skóla og bræður eru ekki sáttir við við - finnst sko sumarfríið nýbyrjað. 

 

 

Loksins fullorðinn

Í gær náði þessi öðlingur þeim áfanga að verða 40 ára og telst því vera kominn í fullorðina manna tölu.

Kæri bróðir  - þó svo þú hafir í gegnum árin verið pirrandi, óþolandi, þolandi, alveg ágætur, stundum leiðinlegur og stundum stórskemmtilegur, ( varst t.d. óþolandi þegar þú drakkst bjórinn hjá Dillu forðum daga ) þá ertu traustur og heiðarlegur, með sterka réttlætiskennd og vinur vina þinna.

Ég myndi ekki  vilja breyta þér á neinn hátt.

Vonandi var dagurinn í gær eins og þú vildir hafa hann.

til hamingju með daginn hafnfirski bróðir

kveðja frá fullorðnu systur og fjölskyldu í Grindavík