það minnkar á manni t****ð ef maður drekkur

Mountain Dew fræddi 12 ára frændi okkur á um daginn en hann fékk far með okkur á fótboltamótið á Akureyri um daginn.  

í upphafi ferðar komum við í Íkea og ákváðum að næra okkur á afar hagkvæmum Ikea pylsum/pizzum og gosi áður en ferðalagið hæfist.  Umræddur gosdrykkur  var einmitt í boði og þá fengum við þennan fróðleik.  Mér þótti þetta afar áhugavert og spurði frænda betur út í þetta.  Hann fullyrti að þetta stæði í blöðum ( eða á netinu, var ekki viss ) og það væri búið að rannsaka þetta.

Héðan í frá væri þetta bara drykkur fyrir konur  

Frændi OG bræður drukku allir Fanta með pylsunni/pizzunni.

Datt þetta í hug þegar bræður fengu að smakka nýja útgáfu af umræddum gosdrykk ( með berjabragði ) í gær og datt í hug að gúggla þetta.  

 komst að því að hann er ekki sá eini sem veltir þessu fyrir sér !! 

 

við erum komin heim aftur

eftir tveggja vikna fjarveru frá heimilinu.

Byrjuðum á fótboltamóti á Akureyri - héldum svo áfram á austurleið - stoppuðum nokkra daga í höfuðstað Austurlands ( Djúpavogi ) og tókum okkur svo aðeins lengri tíma en venjulega að fara þaðan og heim.

Við erum búin að njóta ferðarinnar í botn en það var líka rosalega gott að komast heim.  Erum m.a búin að

 

• heimsækja ýmsa staði,
• vera dugleg að fara út úr bílnum og skoða,
• keyra yfir fullt af fjallvegum -
• baða sig í ám ( aðallega yngri kynslóðin samt )
• skoða hella
• skoða fossa frá öllum hliðum, framan, aftan ofan og neðan.
• borða nesti úti
• borða súkkulaðimúslí í morgunmat
• fara í sund
• skipa fótbolta
• sofa vel og lengi
• spila kana
• og svo má lengi telja....... 

Veðrið var eins og eftir pöntun nánast allan tímann og við sváfum svakalega vel í tjaldvagninum.   - Bræður fóru að fyrra bragði að sofa á kvöldin og ætluðu helst ekki að nenna á fætur á morgnanna.  Svo þegar við erum komin heim þá finnst þeim sjálfsagt að fá að vaka til miðnættis  

Ég held að fjölskyldan hafi öll verið sammála um að það var rosalega gott að sofna í sínu eigin rúmi, fara í bað, borða kvöldmat af glerdiskum og drekka úr glerglösum.  Svo skulum við ekki minnast á þá sælu að horfa á sjónvarp og komast í tölvu :-)

Annar sonurinn nefndi það sérstaklega hvað það væri gott að skíta í sitt eigið klósett !

Spjallaði við norska bróður og Hafdísi í dag - sú stutta var í fínasta skapi og fannst ég bæði hipp og kúl að sýna henni ýmsa fídusa í vefmyndavélinni.  Ég gat sett upp gleraugu, kattarandlit sem gubbaði, skegg og nýtt hár.

Svo bauð hún mér í afmælið sitt - ég lít á það sem heiður og er stórkostlega upp með mér af því.  Það er hins vegar spurning hvort boðið gildir ennþá þegar afmælið verður.

Sá stóri mætti í vinnu í dag -  sumarfríi lokið í bili.  Svo ætlar hann í meira frí seinna til að æða á fjöll og snúa niður dýr með stór horn. 

 

 

 

 

 

Hafnfirski bróðir á afmæli í dag

Alltaf ungur í anda en hættur að telja árin ( og hárin )

 

Ég ætla sko aldrei að fara í svona steggjapartí

sagði næstum 11 ára sonur með áherslu þegar 90201 var lokið í sjónvarpinu - 2 það fóru bara allir í fangelsi eftir partíið."

Við sjáum nú til hversu djúpt þetta ristir.............. hef grun um að hann hafi verið búinn að gleyma heitstrengingunni 3 mínútum seinna enda uppáhaldsþátturinn Hawaii -Five 0 á dagskrá strax á eftir.

Bræður fengu nýja skó í dag - gerðum ágætis kaup í "BH búðinni" .  

uppskrift að góðu föstudagskvöldi ?

Uppskrift RÚV hljóðar svona :

 

Fótbolti

Tónleikar með Justin Bieber

Barnaby.

 

ef maður lifir þetta af þá tekur við B mynd frá 2006

 

ég held að RÚV og ég séum ekki sammála um hvernig gott föstudagskvöld á að vera  

nú er ekki lengur hagkvæmt að borða í Ikea

Fyrir þá sem ekki vita er frítt í Ikea fyrir börn yngri en 12 ára.   Bræður verða 11 ára á þessu ári.

Við erum búin að fara tvisvar á þessu ári á Ikea restaurant,

í fyrra skiptið vildu þeir báðir fá mat af "fullorðinsseðli "  - smakkaðist vel.

í seinna skiptið fékk annar sonurinn ( sá matgrennri ) sér af barnamatseðli en hinn vildi af fullorðinsmatseðli. - Barnaskammturinn var langt því frá að vera nóg  og strákur var ennþá svangur.

Sænskt Ikea súkkulaði í eftirmat dugði til að seðja sárasta hungrið á heimleiðinni.  Þegar heim kom fékk hann sér meira að borða.

 

En - auðvitað er ennþá hagkvæmt að borða í Ikea - þrjár máltíðir og gos með matnum á ca 2500 kr.  Það gerist ekki mikið ódýrara. 

 

taekwondo og ball í dag

Fjölskyldan horfði á júróvision, borðaði næstum heimagerða pizzu ( botninn keyptur tilbúinn ) og tortillakökur með fyllingu inni í stofu.
Drukkum gos með og fylgdumst með keppninni.

Annar sonurinn lét álit sitt í ljós öðru hvoru :

" hún er bara rammfölsk " Grikkland. ( ekki gat mamman heyrt það )
" hann er eins og einn í Pollapönk " um íslenska bakraddasöngvarann Gísla Magnason.
" það er eins og henni hundleiðist á sviðinu " um hina 17 ára belgísku söngkonu.

Annars var hann nokkuð sáttur.

Síðasta æfingin í taekwondo fyrir sumarfrí í dag og svo próflokaball frá 18-20 í kvöld. Síðasta prófið var í dag.
Það er opin sjoppa á ballinu, það er mikilvægast !

Styttist í sumarfrí hjá bræðrum

Bræður telja dagana þar til kemur að sumarfríi. Eru samt andlega löngu hættir í skólanum, vilja vaka fram á kvöld og annað hvort horfa á sakamálaþætti í sjónvarpinu eða vera úti eftir kvöldmat og leika.

Uppstigningardagur ( og frí í skólanum ) á fimmtudag. Starfsdagur (og frí í skólanum ) á föstudag. Svo helgarfrí og ekki mæting í skólann fyrr en kl 10 - því það eru komin próf

. Bræður voru kyrrsettir heima að læra fyrir íslenskupróf í smá stund um helgina. Annnar sonur átti að vera að lesa sögu um miskunnsama samverjann

" mamma, A (bekkjarsystir) segir að maður fái að skera í rottu eða músarheila þegar maður kemur í níunda bekk " - umrædd bekkjarsystir á reyndar systkini í nínuda bekk svo eflaust er þetta rétt en ef þetta er ekki merki um að áhuginn fyrir heimalærdómi ( og miskunnsama samverjanum ) sé enginn þá veit ég ekki hvað 

norski bróðir og fjölskylda á Íslandi.  Ekki náði ég að hitta þau svo viðkynning við nýja fjölskyldumeðliminn bíður betri tíma.  Sem betur fer er sú stutta farin að vilja spjalla á skype svo ég reyni að hemja mig þar til ég fæ að strjúka fallegu krullurnar hennar.   En til að taka af allan vafa þá langar mig líka að hitta foreldra hennar !  ÞIÐ ERU EKKI DOTTIN ÚR TÍSKU OG GLEYMD  bara svo það fari ekki á milli mála.

í staðinn fyrir að bruna austur og eyða smá tíma með foreldrum og systkinum sat ég á bekk í íþróttahúsinu við Ásbrú ( gamla hersvæðið ) og horfði á bræður  - ásamt fleiri börnum og fullorðnum - sparka og slá út í loftið.  Það voru æfingabúðir í taekwondo og þeir sem mættu þar og stæðu sig vel yrðu verðlaunaðir með nýju belti.

( Beltin segja til um hversu langt einstaklingurinn er kominn í íþróttinni ) 

Bræður höfðu bæði gagn og gaman af og komu heim afar glaðir með nýtt (gult) belti eftir næstu æfingu. 

Næstum komið alvöru pallaveður - garðhúsgögnin komu ekki vel undan vetri og bóndinn búinn að dunda sér við að pússa og bera á um helgina. - Veðurspáin alveg ljómandi fyrir næstu helgi.  Þá fer maður örugglega út á pall. 

 

 

 

 

hrakfallavikan mikla.

Fjölskyldan, bæði unglingar og ellismellir fóru í klippingu í vikunni.  Ef hárið hefði verið vigtað hefði það örugglega vegið eitt kíló, svo lubbaleg var fjölskyldan orðin.  

75% af fjölskyldunni er líka búin að fara til tannlæknis, í eftirlit.  Við hittum tannlækninn að sama tíma að ári þegar kemur aftur að eftirliti.

Sá stóri fann fyrir brjóstverk í vikunni og leitaði læknis að vinnudegi loknum.  Fjölskyldusagan er þannig að það hringir viðvörunarbjöllum og læknar vilja skoða hann í hólf og gólf.  Sem betur fer virtist allt vera í lagi en þar sem klukkan var orðin meira en miðnætti þegar læknisrannsóknum lauk ákvað sá stóri að vera heima daginn á eftir.  

Þann dag sem sá stóri hvíldi sig var hringt úr skólanum - strákur hafði snúið sig illa á fæti.  Sama dag fór ég með hann í Keflavík til að láta skoða fótinn - ef hann skyldi vera brotinn.  Sloppaklædda fólkið taldi svo ekki vera.  Amma í rauða húsinu á hækjur í barnastærð og þar sem tábrotni frændi var hættur að nota þær gat stráksi fengið þær lánaðar.

Á föstudegi var halti haninn ekki enn farinn að stíga í fótinn.  Hinn sonurinn vaknaði útsteyptur í bólum og klæjaði ógurlega.  Ég smurði hann með einhverju kremi sem átti að vera gott við kláða.  Klukkutíma seinna var hringt úr skólanum - strákur orðinn viðþolslaus af kláða og doppóttur á efri hluta líkamans.   Ég sat í stólnum hjá hárgreiðslufrænku sem var nýbúin að setja lit (til að fela gráu hárin ) í hárið á mér.  

Elskulegur starfsmaður skólans smurði hann í meira kremi og gaf honum ofnæmistöflu.  Einhvern veginn varð barnið að lifa þetta af þar sem móðirin var upptekin í fegrunaraðgerð og mátti ekkert vera að því að hugsa um barnið.  

Þegar ég var orðin hæf til að láta sjá mig á almannafæri var brunað í skólann og báðir erfingarnir sóttir, áfangastaður heilsugæslan.  Eftir samtal við hjúkrunarfræðing var doppótta syni skutlað aftur í skólann enda ljóst að ofnæmistaflan var að gera sitt gagn.  ( sturtusápa með ilm og litarefnum sem sonurinn þvoði sér með kvöldið áður var tilnefnd sem sökudólgur )  

Hinn sonur fékk ekki að fara úr bílnum  - áfangastaður Keflavík þar sem myndataka var heimtuð.  Myndatakan staðfesti að engin bein voru brotin en ung og elskuleg læknakona útbjó fyrir mig beiðni fyrir sérfræðing enda full ástæði til að að láta skoða fæturna á stráksa sem var að snúa sig á sama fætinum í 6 skiptið þetta skólaárið.

Fyrir utan þessar heilsufarsökuferðir, snúninga og áhyggjur þessa vikuna er ég líka búin að fara með hækjulausa soninn í Reykjavík þar sem hann spilaði fótbolta í grenjandi rigningu og roki og fara sitthvort kvöldið með sitthvorn soninn að sýna leikrit í Grunnskólanum.

Ef ég er ekki búin að vinna mér inn titilinn mamma skutla þessa vikuna þá veit ég ekki hvað 

Er annars bara nokkuð góð og vonast eftir að næsta vika verði rólegri.  

Eftir næstu viku eru bræður svo komnir í páskafrí, þeir eru bara sáttir við það  

 

 

Hvað er að skera undan mamma ?

spurði sonur þar sem hann las fyrirsagnirnar á mbl.is yfir öxlina á mér um helgina ?

Ég útskýrði það fyrir honum ( og hinum syninum líka ) á eins einfaldan hátt og ég gat.  Sagði þeim efni fréttarinnar í stuttu  máli.  Bræður hrylltu sig og þótti verknaðurinn afar ljótur, sem hann auðvitað er.

Stundum koma örstutt augnablik þar sem ég er ekkert glöð yfir að bræður séu orðnir læsir. 

13 ára fangelsi fyrir að skera undan ástmanninum